Wia ällas a'gfanga hod od'r iber Luschd ond Fruschd beim Bulldogle schrauba.........
 
ond wer jetzd scho meckra will, dem isch ois glei gsagt: bei ons hoißt jed'r Traktor Bulldog - isch eigendlich ganz oifach ond viel bess'r zom ausschprecha - also dohanna weid'r lesa ond ruhig sai od'r dia Hochdeutsche Version benutzen.
           
Wer...
...an dem Ganza schuldig isch, des woiß m'r jetzd eigendlich au nemme so recht.
-- Warad des dia Oldtimerfreunde Gingen/Fils e.V., dia an jedem halbwegs a'stendiga Dag ihre alde Bullgodla aus de' Scheura rausg'hold hend ond durch da Flegga g'fahra send
-- od'r isch's oifach ed wohr das ma' mid ma naglneia Audo en da Wald gohd zom Holzmacha
-- od'r war's ganz oifach d'r Reiz von d'r guda alda Technik, des alde Glomb von vor 50 Johr ausanander zom schrauba ond zom Richda.
Wann m'rs ab'r g'nau a'guckt isch's, glaub' i, a Mischong aus ällam, was mi d'rzu trieba hod, so an alda Bock zom sucha, der net zu ald ond v'rgamm'ld war, ond au no billich g'nuag om net ma knickriga Schwoba an da Rand von ama Herzinfarkt zom brenga.
           
G'fonda...
...han'an en Nürtinga. Do isch'r g'standa, a' Fahr D90, alloi en ra Garasch zwischa Bloma ond Audoroifa. Noch faschd 2 Joahr romstanda en ra Garasch hod an d'r Kerle nemme wella, weil'r oifach koin Pladz me' keh'd hod.  Noch a' paar g'scheide Drähonge an d'r Kurb'l isch 'r au scho a'g'lofa. Ond halbweg's guad ausg'seha hod 'r au no, damid d'r knickrige Schwob' net so viel Geld en den Karra naistegga muaß.
           
Fir älle, dia jetzd 's Mäckra a'fanga wellad: "Wia schreibd der schwäbisch" - ruhig sai ond hochdeutsche Version nemma
           
Also...
...nex wia des Bulldog'le kaufa ond an hoimbrenga. Am 1.Mai 2001 han i dann a nuia Badderie neig'schraubd ond ben übr Landstroßa ond Feldwegla dia guade 30 Kilomed'r hoimg'fahra. Ons're Kend'r hods schier omg'rißa, wia'se des Bulldogle g'seha hend. bloß bei mein'r Frau war dia Begeischderong no net so arg groß - ab'r des ka' ja no wärra. en jedam Fall hend zersch amol dia Nochb'r neugierig gugat.
           
Da erschda...
..Ei'satz fir den Fahr hods dann em Wald beim Brennholzmacha geba.
Doch dia Fraid am Buldogfahra hod et lang g'hebt. Noch 14 Däg als Bulldoglesbesidz'r hod me dann d'r Haß packd. Do hod doch d'r Sch.......karra g'rauchd und g'schdonga, das'es d'r Sau graußt hod, d'r Karra hod so jehmmerlich g'schleggld, das d' Fuaßgeng'r vom d'r stroß' g'flichdad send ond Fui'rwehr wär au no faschd ausg'rickt so hod d'r Bock g'qualmad.
's End' vom Liad war dann des, daß m'r da Fahr abg'schlebbd hend ond ons en allr Ruah' iberlegd hend was d'r Fahr so ällas han kend?!?!?
Doch au jetzd hod sich wied'r zoigd - dia Axd em Haus spard da Zemmerma' - mid ma Kfz-Moischd'r als Vadd'r  war dui Schraubrei bloß no halb so schwer. Noch o'zählige Ibrlegonga üb'r da Z'rschdörongsgrad vom Modor, a'gfanga vom Fress'r bis zu Lagerschäda an d'r Kurblwella war ällas meglich d'rbei wa ma sich so denga ka'.
           
Na, gohds no, od'r doch liab'r zur hochdeutschen Version
           
Wohl'r war m'rs ....
...dann am Mondag d'ruf: Rond'r mit'em Zylind'rkopf - a Fress'r wars ned - ab'r d'rfir warad Eischlagschpura auf'm Kolba . D' nächschda V'rmudung - des mid'am Lag'rschada an d'r Kurb'lwell' war noch näh'rem Nochgugga rechd o'wahrscheinlich.
Dann hen'mer dia Eischprdzdüs' ondersuchd, mit'm Ergebnis das des Deng eh'r g'sabberd hod, aber scho lang nemme so richdig g'schpritzd.
Jedzd han i bloß no ebb'r brauchd, der doi Düs' wied'r richta ka.
G'fonda han i dann en Mössinga dia Fa. Hoeckle, dia dui Eischpridzdüs' a'nand'rnoch wied'r g'richd hod. Jedzd warad ab'r emm'r no dia Eischlagschpura em Kolba - noch a paar Telefonade ond a bißle froga hod sich rausg'schdellt, daß irgend so a Schlambb'r amol v'rgessa hod, dia Dichtung zwischa d'r Eischpridzdüs' ond em Zylind'r wied'r neizommacha, do hod dann doi Düs' bis em da Kolba naglangad. Also han i a neua Dichdung neig'machd ond scho isch wied'r a'schdändig g'loffa.
           
Ond wied'r...
...en da Wlad zom Holzhagga war dann dia Haubtbeschäffdigong ib'r da Somm'r. Noch a Paar Wochaenda ond 30 Med'r Holz späd'r war ersch a mol Pause. Ond genau do hods mi packd. En der Zeid han i mi durchg'rongga, daß i den Fahr aus'anand'r schraub zom'an richd was zum richd war ond'an oifach nei lackiera.
           
Schwäbisch schreiba isch fei scho an recht'r Sch......, wenn's lesa nemme gohd: zur hochdeutschen Version!
           
D'r oinzigschde Nochdoil...
...bei d'r Sanierung von dem Fahr isch em Augabligg ganz oifach des, das i grad wed'r a Garasch no an Schubba oder sowas han,  do dia Bauwerk ganz am End' d'r langa Lischde vom onsrer Hausbauerei standad. So musse halt an meim Bulldogle schrauba wenns net regnad, des hoißt ällas wegschrauba, en Kell'r traga. putza ond richda ---- eba ois noch'am andra.
           
D' kompledda Vord'rachs'...
...mitsamd d'r Modorhaub' liegt grad em Kell'r ond wird von d'r ganza Schmiere ond  Stroaßadreck befreid, der sich an dem Fahr dia ledzde 50 Joahr so a'g'sammeld hod. D'r V'rbrauch an Kaldreinig'r ond Pudzlomba schdeigd gigandisch a' ond em Kell'r siehds aus wia bei Hempl's ond'r 'm Sofa.
           
Endlich...
...han i em Dezember 2001 des passende Dromrom g'fonda - nach guade 550 Kilometer Fahrt ond 6 Stunda späd'r - a Mähwerkle en a 'ma rechd guta Zuastand mitsamt 'ra Soilwind ond des Ganze au no zu'ma a'stendiga Preis. Dia Doil wärad wohl irgendwann em Somm'r od'r Herbschd g'richdad.
Jedzd han i also no me rumstanda ond emm'r no koin Schubba en den'e mei ganz G'lomb neido ka'-- aber äba ois noch'am andra...
           
Des schwäbisch, des an andrer geschrieba hod, isch au net leichd zom lesa, gell!
Vielleicht doch hochdeutsch!?!?!
           
ond 's gohd weid'r...
...bloß hald zom greschda Doil mit'am Hausbaua ond so wird hald en dem Wend'r bloß d' Modorhaub, d'r Tank, d' Vord'rachs ond a paar Gloidoil frisch lackierd. Do sieht d'r scho' a bißle zum Schießa aus - vorna nui a'g'moald ond henda rum ällas no dreckig ond wiaschd.
Ab'r jedzd wird zersch des Hausdach nui deckd ond no a bißle Holz g'machd, weil i will ja em Wend'r au wied'r a warma Schdub.
A paar Bilder kommad au no en nächschd'r Zeid, also guggad wied'r amol rei.
           
Ab'r...
...'s goht voran ond des auf jed'a Fall mit'em Hausdach, a Fodovoltaika'lag isch auf'am Dach ond a guads Stickle von d'r Fassad isch fertig, bloß des Bulldogle schdod emm'r no rom wia vor zwoi Johr - ma' ka' halt et ällas auf oimol han.
's duad sich vielleichd em Wend'r no was, wenn's Studio f'r da Nochwuchs no vorher ferdig wird - Schlagzeug spiela en d'r Wohnstub nervd scho a bissle.
           
           

Wer Schreibfehler fendat, därf se b'halda

           
's ledschde mohl abdeidad: 04.01.2009                                                                                                                                  copyright 2002-2009 Wolfgang Zeller
Kommendare ond bleede Bemergunga an Mail an mi